បាលី៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន កំពុងត្រៀមចេញដំណើរពីប្រទេសឥណ្ឌូនេស៊ី ត្រឡប់មកកម្ពុជាវិញ បន្ទាប់ពីយន្តហោះពិសេសកម្ពុជាត្រូវបានប្រទេសដែលត្រូវឆ្លងកាត់អនុញ្ញាតឲ្យធ្វើដំណើរ។
នេះជាការត្រឡប់មកវិញដោយពុំមានការព្រៀងទុកបន្ទាប់ពីសម្ដេចតេជោត្រូវបានក្រុមគ្រូពេទ្យប្រទេសឥណ្ឌូនេស៊ី រកឃើញថាមានវិជ្ជមានជំងឺកូវីដ-១៩។
សម្ដេចតេជោបានសរសេរនៅលើ facebook page របស់សម្ដេចយ៉ាងដូច្នេះថា៖ «ខ្ញុំកំពុងត្រៀមចេញពីឥណ្ឌូនេសុី ត្រឡប់ទៅកម្ពុជាវិញ បន្ទាប់ពីអង្គុយរង់ចាំការអនុញ្ញាតពីប្រទេសដែលយើងត្រូវហោះហើរឆ្លងកាត់។ សូមអរគុណមិត្តឥណ្ឌូនេសុីដែលបានយកចិត្តទុកដាក់ទទួលប្រតិភូរបស់យើងនិងសូមអធ្យាស្រ័យដែលយើងមិនអាចចូលប្រជុំ G20 បាន។ សូមអរគុណបងប្អូនជនរួមជាតិដែលព្រួយបារម្មណ៍ពីសុខភាពរបស់ខ្ញុំ។ ការហោះរយៈពេល ៣ម៉ោង៣០នាទីដែល ខ្ញុំនឹងទៅដល់ក្បាលព្រលប់ល្ងាចនេះ»។
គួរឱ្យដឹងផងដែរថាសម្ដេចតេជោត្រូវបានក្រុមគ្រូពេទ្យនៃប្រទេសឥណ្ឌូនេស៊ីបានរកឃើញថាមានវិជ្ជមានជំងឺកូវីដ-១៩ កាលពីព្រឹកថ្ងៃទី១៥ ខែវិច្ឆិកា ឆ្នាំ២០២២នេះ។
ទោះជាយ៉ាងណាសម្ដេចតេជោបញ្ជាក់ថាស្ថានភាពរបស់សម្ដេចគឺធម្មតាពុំមានរោគសញ្ញាឬក៏សញ្ញាណាមួយនៃជំងឺនេះនោះទេ៕